Kолку чекори треба да правите секој ден ако сакате да стигнете до стотка?

Бројот на чекори што ги правиме дневно сепак има врска со здравјето и долговечноста.  Подолгата дневна прошетка од најмалку 8.000 чекори ќе го намали ризикот од предвремена смрт, односно значително ќе придонесе за продолжување на нашиот живот.

Студија објавена во списанието ЈАМА открива дека луѓето кои одат најмалку 8.000 чекори на ден или околу 6,5 километри, имаат шанса да живеат подолго, вклучувајќи го и ризикот од предвремена смрт од рак и срцеви заболувања, во споредба со оние кои одат двапати помалку. Ако одите уште повеќе, 12.000 чекори, вашите шанси за смрт во текот на следните десет години ќе бидат за 65 проценти помали од оние кои прават четири илјади чекори.

Научниците дошле до овие резултати со анализа на податоците од репрезентативен примерок од 4840 Американци постари од 40 години, кои ги следеле десет години и ги броеле своите чекори со уред што го носеле на колковите. Во десетгодишниот период починале 1165 учесници во студијата.

Се покажало дека повеќе чекори значат помал ризик од смрт. Интензитетот на одење не бил важен.

Во текстот се забележува дека, со оглед на моменталната состојба со корона вирусот, можете да шетате дома, во место, но и надвор, под услов да одржувате дистанца од другите луѓе.