Серијата „Frasier“ се враќа на малите екрани

Американската хит серија од деведесеттите години, „Frasier“, се враќа на малите екрани по 17 години, пренесува BBC. 

Серијата што го следеше животот на докторот Frasier Crane, симпатичен психијатар кој имаше свое радио шоу, и натаму е една од најуспешните ТВ серии на сите времиња. 

Создадена во 1993 година како продолжение на ситкомот на NBC, „Cheers“, серијата се емитуваше 11 сезини и заврши  во 2004 година. Серијата беше прогласена за најдобра хумористична серија 5 пати за 11 години емитување и има освоено 37 награди Emmy. 

Kelsey Grammer, кој го игра ликот на Frasiera, го потврди заживувањето на серијата: „Со нетрпение очекувам да го споделам следното поглавје во продолжението на патувањето на доктор Frasier Crane“, пренесува BBC.

Покрај Grammer, не е потврдено дали останатите членови на оригиналната екипа ќе бидат во продолжението. 

Интересно, Grammer по снимањето на последната сезона изјави дека идеите за ликот на психијатарот сè уште не биле потрошени и дека продуцентската куќа Paramount може да продолжи да го развива ликот. Сега, 17 години подоцна, предвидувањата на Grammer се остварија.