„Солар Македонија“ им додели сертификати на 20 учесници на обуката за изведувачи на системи за обновливи извори на енергија
СКОПЈЕ – 24 февруари, Здружението за сончева енергија „Солар Македонија“ одржа свечен настан за доделување сертификати на 20те кандидати кои успешно ја завршија обуката за изведувачи на системи за обновливи извори на енергија. За време на настанот, поздравни обраќања имаа претседателот на „Солар Македонија“, проф. д-р Илија Насов, вицепремиерот за економски прашања, Фатмир Битиќи и претставникот на канцеларијата на УСАИД во Северна Македонија, Ерик Јановски, додека пак за искористувањето на соларната енергија од фотоволтаичните панели зборуваше м-р Горанчо Паунов.
На почетокот на настанот, проф. д-р Илија Насов ја истакна потребата за развој на квалитетна работна сила во соларниот сектор во земјава. „И покрај поволните природни услови, искористувањето на сончевата енергија во Северна Македонија е на незавидно ниво во Европа и сè уште се соочуваме со недоволен број на стручни инсталатори на соларни системи. Оваа обука ја организиравме токму со таа цел – да се постигне максимална ефикасност од инсталираните соларни системи преку нивно правилно инсталирање“, изјави проф. д-р Илија Насов.
Во своето обраќање пред присутните, Претставникот на Канцеларијата на УСАИД во Северна Македонија, Ерик Јановски, говореше за придобивките од инвестирањето во обновливи извори на енергија и потенцираше дека ваквите инвестиции се предуслов за постигнување одржлив економски развој.
„Во текот на изминатите две децении, УСАИД ги поддржа реформите во енергетскиот сектор во земјава, помагајќи ја диверзификацијата на енергетските извори и развојот на внатрешниот пазар на енергија, како и интеграцијата со регионалните пазари со цел да се осигура енергетска сигурност. Сите овие активности овозможија државата да исполни голем дел од барањата на Енергетската заедница, со што е подобро подготвена да се приклучи на европскиот единствен пазар на енергија“, изјави Ерик Јановски.
Вицепремиерот Фатмир Битиќи ја истакна заложбата на Владата за подобрување на постоечката состојба во искористување на сочевата енергија и напомена дека во наредниот период ќе се настојува обврските спрема Парискиот договор за климатски промени, директивите на ЕУ и останатите документи што е можно повеќе да се вклучат во земјата.
„Солар Македонија“ ја организираше обуката за соларни системи како дел од иницијативата „Јакнење на соларниот сектор преку тренинзи, настап на саеми и активности за лобирање“ поддржана од Проектот на УСАИД за развој на деловниот екосистем. По одржувањето на две пилот обуки во 2019 година, програмата за обуката беше верифицирана од страна на Министерството за образование и наука и Центарот за образование на возрасни во 2020 година. Првата верифицирана обука која се одржа во периодот декември 2020 – јануари 2021 година успешно ја завршија 20 кандидати.
