ПОТРЕБНИ РЕФОРМИ ВО СРЕДНОТО СТРУЧНО ОБРАЗОВАНИЕ (ВИДЕО)
Градоначалникот Петре Шилегов, министерката за образование и наука, Мила Царовска и швајцарската амбасадорка Сибил Сутер денеска одржаа консултативна средба со раководствата на скопските средни стручни училишта и со претставници на бизнис заедницата. На средбата што се одржа во Музејот на современа уметност се разговараше за потребата од реформи за унапредување на средното стручно образование.
- Денеска почнуваме со процесот на реформи во средното образование со започнување дебати, дискусии и анализи околу процесот на таканареченото дуално образование. Во Градот Скопје имаме 23 средни училишта од кои што 15 продуцираат стручни кадри со посебни стручни знаења. Во овој процес, благодарејќи на Министерството за образование и наука и Владата, благодарејќи на Швајцарската амбасада и ангажманот на Град Скопје, правиме анализа на потребите на пазарот. Во тој процес ги вклучуваме и компаниите со цел децата кои го изучуваат средното образование преку дуалното образование да бидат доволно стручни и способни, според потребите на пазарот на трудот и според она што го бараат компаниите како дефицитарен кадар. Целта е тие деца утре да бидат конкурентни на пазарот, стручни и добро платени. Денеска го почнуваме овој процес и јас очекувам дека веќе од наредната училишна година ќе може да зборуваме дека децата учат според потребите на пазарот на трудот, за да обезбедиме поефикасни и подобри работни места за нив – рече градоначалникот Шилегов.
Град Скопје преку 15-те училишта обезбеди целосна поддршка на МОН при спроведувањето на анализата со која се утврдува соодветноста на постојните образовни профили што ги нудат училиштата, како и потребата од нови профили кои им се потребни на компаниите, но не се вклучени во наставните програми. Во услови кога кадрите кои имаат завршено средно стручно образование стануваат дефицитарни, оваа реформа во средното стручно образование ќе овозможи средните училишта да произведуваат кадри кои ќе ги задоволат потребите за ваков стручен кадар.
Град Скопје
