Смислата за хумор може да ви го продолжи животот за 8 години

Психологот Jennifer Aaker и деловниот консултант Naomi Bagdonas напишаа книга за смеата и нејзиното влијание врз животот. Книгата цитира бројни студии кои докажуваат дека смеењето го подобрува квалитетот на животот, но и дека може да го продолжи за 8 години. 

Книгата „Хумор, сериозно“ ги објасни резултатите од истражувањето кое опфати 1,4 милиони луѓе во 166 земји низ светот, а резултатите велат – премногу ретко се смееме. 

Откриле и дека стапката на „смеа“ се намалува по 23-та година од животот, или всушност во главната точка на пресврт во зрелоста, после факултетот. 

Едно истражување од книгата открило дека четиригодишно дете се смее 300 пати на ден, додека човек на четириесет години се смее 300 пати на секои 10 недели. Исто така, истражувањето докажува дека здравата смисла за хумор може да помогне и во работа и во животот. 

Книгата укажува на студија од Норвешка, која следела повеќе од 50.000 луѓе во текот на 15 години. Резултатите покажале дека оние со поизразена смисла за хумор живееле во просек осум години подолго од другите. 

Списанието Travel and Leisure објави дека Aaker и Bagdonas ја препознале важноста на хуморот и започнале специјални часови за хумор во Бизнис школата во Стенфорд.