Mатријархатот има позитивен ефект врз здравјето на жените

Научниците тврдат дека животот во матријархално општество е добар за здравјето на жените. Тие дошле до таков заклучок по истражувањето спроведено во кинеската етничка група Мосуо, во кое жените имаат доминантна социјална улога. 

Во оваа заедница, децата го наследуваат презимето на нивната мајка, а не татковото. Тие управуваат со финансиите во домаќинството, додека сопственоста на имотот се пренесува на женските потомци. Жените имаат исти сексуални слободи како и мажите. 

Научниците го споредиле здравјето на жените од заедницата Мосуо со здравјето на жените кои живеат во доминантната кинеска заедница. Жените од етничката група Мосуо имале за половина помали шанси да имаат хронично воспаление. Исто така, имале помала веројатност да имаат висок крвен притисок. 

За научниците, ова е индикатор дека автономијата и контролата над ресурсите позитивно придонесуваат за здравјето на жените. Ова истражување би можело да помогне и во одговорот на прашањето зошто жените ширум светот страдаат од сериозни болести. 

Ова не е прва студија со која се истражува врската помеѓу нееднаквоста и здравјето. Луѓето кои страдаат од расизам имаат поголем ризик да се разболат. Покрај тоа, најбогатите Американци живеат 20 години подолго од нивните сиромашни сограѓани, објавија од Светскиот економски форум.