„Добро утро драги гости … ако се заразите ќе ви ги вратиме парите“

Додека скоро сите европски скијачки центри се затворени, Јахорина во БиХ ги руши сите рекорди на посетеност. 

Гости доаѓаат од сите околни земји, епидемиолошки мерки постојат, а т.н. „ковид гаранција“ и тоа како ги привлекува туристите. 

“Добро утро, драги гости, драги скијачи. Сите патеки ви се на располагање. Маските се задолжителни, ве молам почитувајте ги мерките. Денес може да уживате на сите патеки на олимписката Јахорина – ова е пораката која секое утро веќе 90 дена на мегафон ја соопштуваат вработените во Олимпискиот центар Јахорина. 

Како што пишува Дојче веле, сè на планината работи совршено, иако, кога станува збор за почитување на епидемиолошките мерки, тие се повеќе на хартија отколку во пракса. 

Ова е, како што се наведува, очекувано, имајќи предвид дека е невозможно да се почитува каква било мерка со неколку стотици скијачи на појдовните станици на која било жичарница. 

Повеќето гости се од Србија, но голем број има и од Хрватска, Словенија и Црна Гора. Гости од Германија и Австрија исто така можат да се сретнат на планината.

Сепак, она што е најинтересно во целата приказна е т.н. „ковид гаранција“. Во пракса, ова значи дека ако некој гостин се зарази со корона вирусот, ОЦ Јахорина гарантира враќање на најмалку 80 проценти од средствата или трансфер на аранжманот за следната година или за некој друг термин. 

Уште една добра работа е тестирањето на самата планина, каде гостите можат да се тестираат практично на скии, а резултатите им се готови за неколку часа.