Побрза постапка за „подобрените“ вакцини против новите видови на корона

Европската комесарка за здравство Стела Киријакидес изјави дека ЕУ ќе ги забрза процедурите за пласирање на „подобрените“ вакцини против новите варијанти на коронавирусот на пазарот. 

Во интервју за денешниот германски Аусбургер, Киријакидес исто така најави забрзување на вакцинацијата во ЕУ во вториот квартал од 2021 година и го повтори очекувањето дека 70 проценти од Европејците ќе бидат вакцинирани до крајот на летото. 

„Заедно со Европската агенција за лекови, одлучивме вакцините што производителите ги „подобруваат“ со цел да се борат против нови мутации, не мора да поминат низ целиот процес на одобрување. На тој начин побрзо ќе се има соодветни вакцини без да се загрозува безбедноста“, изјави Стела Киријакидес. 

Европската агенција за лекови досега им даде одобрение за употреба на вакцини против Ковид-19 на компаниите „Фајзер и Бионтек“, „Модерна“ и „АстраЗенека“, а вакцината на компанијата „Кјурвак“ исто така влезе во процедура за одобрување . 

За германскиот весник, Киријакидес го повтори ставот на Европската комисија дека затворањето на внатрешните граници во ЕУ не е ефикасно оружје против вирусот и неговите нови варијанти.