Алонсо успешно опериран по несреќата која се случи во четвртокот

На шпанскиот возач Фернандо Алонсо му беше оперирана горната вилица и би требало да се опорави на време за почетокот на новата сезона во Формула 1, соопштуваат од Алпин.

Инцидент се случил во четвртокот, кога Алонсо, кој возел велосипед, удрил во автомобил во близина на неговата куќа во Лугано. Двократниот светски шампион веднаш бил пренесен во болница, каде е опериран. 

“Лекарскиот тим е задоволен. По неколку дена целосен одмор, Алонсо ќе може да продолжи со тренинзите. Очекуваме дека тој ќе биде целосно оперативен за подготовките за новата сезона “, се наведува во соопштението на францускиот тим. 

Предсезонското тестирање ќе се одржи од 12 до 14 март на патеката Сакир, каде новата сезона ќе започне на 28 март со трка за Големата награда на Бахреин. 

Алонсо се врати во Формула 1, откако ја заврши својата кариера на крајот на сезоната 2018 година. 

Тој победи на 32 трки и постигна 97 пласмани на подиум. Тој ги освои шампионските титули во 2005 и 2006 година, возејќи за Рено, кој од оваа година ќе се натпреварува под името Алпин.