Кога филтерот на Зум ќе остане вклучен: Американски адвокат се појави како мачка
На онлајн судско рочиште во Тексас се случи ситуација што ги насмеа присутните на рочиштето, како и многу други. Имено, наместо адвокат, на екранот се појави мачка.
Апликацијата „Зум“ била искористена за сослушување, а адвокатот Род Понтон вклучил филтер за прикажување мачка. Судијата Рој Фергусон му предложил да ги прилагоди поставките, т.е. да го исклучи филтерот. Понтон им се обрати на учесниците на расправата.
“Дали ме слушате? Јас сум тука, во живо, но не сум мачка”, рече тој.
Судијата Фергусон изјави дека тоа може да му се случи на секого и дека тоа не е шега, а Понтон успеа да го исклучи филтерот.
“Кога детето го користеше компјутерот, тогаш го вклучил филтерот. Се разбира, адвокатот веројатно не требаше ни да знае дека оваа можност постои”, рече Фергусон.
Понтон изјавил дека мора да го користи компјутерот на секретарката и претпоставува дека таа или нејзината ќерка го вклучиле филтерот.
Ова не е ниту прво ниту последно сослушување преку Интернет во Тексас. Одржани се безброј за време на пандемијата.
Понтон се огласи и на Твитер и даде совет.
„Ако вашето дете го користи вашиот компјутер, тогаш пред секое сослушување на Интернет, проверете дека филтерот е исклучен“, напиша тој на Твитер и објави снимка од сослушувањето.
Тој изјави дека на почетокот бил засрамен, но дека подоцна сфатил дека станала вирална приказна за Интернет. Како што рече, на сите им треба малку хумор поради тоа што се случуваше во последните неколку месеци, пренесува Си-Ен-Ен.
