Изгубен паричник, вратен по 53 години

Паричникот што американскиот воен метеоролог Пол Гришам (91) го изгубил за време на тринаесетмесечна експедиција на Антарктикот, се појави по 53 години во Сан Диего, Калифорнија. 

“Бев целосно шокиран. Многу луѓе беа вклучени во враќањето на паричникот и на крајот успеаја да ме пронајдат”, изјави Гришам, пренесува Гардијан.

Во паричникот имало негова поморска легитимација, возачка дозвола, упатства што да се прави во случај на атомски, биолошки и хемиски напад, картичка за нарачка за пиво, даночна изјава и налози за трансфер на пари на неговата сопруга. 

Гришам, кој пораснал во градот Даглас, Аризона, се приклучил на морнарицата во 1948 година, прво работејќи како техничар, а потоа како метеоролог. 

Во 1967 година, тој отишол на Антарктикот, како дел од операцијата во која биле вклучени цивилни научници, а во тоа време тој имал триесет години, оженет, татко на две деца. 

Се повлекол од морнарицата во 1977 година.