Во Германија ќе падне „крвав снег“

Метеоролозите во Германија предупредуваат дека во таа земја е можен црвен или крвав снег за време на викендот, необичен метеоролошки феномен предизвикан од екстремни временски услови. 

Ќе дојде студен воздух од Скандинавија кон северот на Германија и ќе донесе снег и бури, а метеоролозите предвидуваат снег до 40 сантиметри, и топол воздух од Сахара на југот на таа земја, кој носи температури од 16 степени. 

Воздухот од Сахара носи честички од песок што ќе го обои снегот црвено.

Андреас Фридрих од Германската метеоролошка служба објасни за германските медиуми дека појавата на црвен снег се јавува кога честичките од песок и повисоките слоеви на атмосферата се мешаат со снежните кристали што паѓаат на земјата.

Сепак, експертите наведуваат дека за оваа појава не е виновен само песокот од Сахара, туку и микроорганизмите, познати како снежни алги, кои можат да ја променат бојата на снегот за време на топењето, пренесуваат медиумите.