Со продажба на маици со сликата на Сандерс собрани се 1,8 милиони долари за добротворни цели

Волнените ракавици и начинот на кој американскиот сенатор Берни Сандерс седеше на претседателската инаугурација предизвика мноштво реакции на социјалните мрежи, што помогна да се соберат 1,8 милиони долари за добротворни организации во државата Вермонт. 

Сумата на пари доаѓа од продажба на маици со слика на Сандерс како седи со скрстени нозе и носи рециклирани волнени ракавици. 

Сандерс на својата веб-страница во четвртокот вечерта го постави првиот од т.н. производи „Chair Sanders“, вклучувајќи и маици со налепница, а првата серија се распродаде за помалку од 30 минути. За време на викендот, беа додадени уште парчиња кои се распродадоа до понеделникот наутро.

„Џејн и јас сме изненадени од целата креативност што многу луѓе ја покажаа во текот на изминатата недела и среќни сме што можеме да ја искористиме мојата слава на социјалните мрежи за да му помогнеме на Вермонт“, изјави Сандерс. 

Тој вели дека износот на пари што го собрале не е замена за неговата работа во Конгресот, каде што тој ќе стори сé за да се осигура дека луѓето во Вермонт и низ целата земја ќе ја добијат потребната помош среде најтешката криза предизвикана од пандемијата. 

Ракавиците на Сандерс ги изработила наставничката Џен Елис од Вермонт, сопственичка на компанија што прави нараквици од рециклирана волна.