Johnson & Johnson следната недела ќе ја претстави својата вакцина против Ковид-19

Американската компанија „Johnson & Johnson“ следната недела треба да ги објави резултатите од третата фаза на тестирање на својата вакцина против коронавирусот. 

Компанијата вели дека резултатите ќе бидат обемни и многу инклузивни во однос на опфатот на различни групи засновани на етничка припадност, возраст, географска клима, вклучително и Афроамериканци, Латиноамериканци и стари лица, пренесува CNBC. 

Се наведува дека е можно да има разлика во резултатите од тестовите на места како што е Јужна Африка, каде што е откриен нов многу заразен мутиран вид на вирус.

Вакцината на „Johnson & Johnson“ може да биде одобрена за употреба веќе следниот месец. 

За разлика од другите вакцини кои се одобрени за употреба во САД, вакцината на „Johnson & Johnson“ не се дава во две дози од три до четири недели, туку е потребна само една доза, поедноставувајќи го целиот процес на имунизација. 

Модерна вчера објави дека работи на зајакнување на вакцината против сојот откриен во Јужна Африка, откако откри дека е помалку ефикасна против оваа мутација.