Johnny Rotten стравува дека серијата за Sex Pistols ќе ја уништи репутацијата на бендот
Фронтменот на Sex Pistols, Johnny Rotten изјави дека телевизиската серија која ќе се снима за култниот британски панк бенд е без негова согласност и тој сега за сега нема никаков придонес.
Rotten, чие вистинско име е John Lydon, изјави дека се плаши дека серијата, режирана од режисерот оскаровец Danny Boyle, „ќе се обиде да го уништи угледот и наследството на бендот“ и треба да се смета за „отровен чин“.
Минатата недела, телевизиската мрежа FX објави снимање на минисерија во шест епизоди, наречена „Pistol“, која ќе ги „оживее“ мемоарите на гитаристот Steve Jones од 2016 година „Lonely Boy: Tales from a Sex Pistol“.
„Не знам ништо за тоа, ама баш ништо“, изјави Rotten. „Никој не стори ништо за да ме праша или да побара мој придонес или учество на кој било начин и во каква било форма.
„Тие … ќе се обидат да го уништат угледот на нешто толку големо. Многу е опасно тоа што го направија, без никаква почит“.
„Ќе видиме, дали ќе ни се обрати и ќе разговара со нас“, изјави Rotten.
Портпарол на ТВ-мрежата рече дека и авторите на серијата и Boyle контактирале со агентот на Rotten за да му кажат за минисеријата, која треба да започне со снимање во март.
Sex Pistols се основани во Лондон во 1975 година и засекогаш гo променија британското општество и култура. Заслужни се за започнувањето на панк-движењето во Велика Британија.
