Почнува ракометното лудило. Еве сè што треба да знаете за Светското првенство

Со натпреварот помеѓу Египет и Чиле денес од 18 часот започнува 27 Светско првенство во ракомет. 

Ова ќе биде првото СП на кое ќе учествуваат 32 репрезентации поделени во осум групи од по четири репрезентации. Најдобрите три репрезентации од секоја група се пласираат во втората фаза, каде ќе бидат формирани четири групи со по шест селекции, а најдобрите две ќе изборат пласман во четвртфиналето на Светскиот куп. 

Најтрофејна ракометна сила во историјата е Франција со 11 медали, од кои шест се златни. И Шведска има 11 медали, четири златни, колку што има и Романија, додека Германија, Русија и Шпанија имаат по две златни медали. СФР Југославија има четири медали, една златна и една сребрена и две бронзени, а СР Југославија двапати беше трета на Светските првенства.

Титулата од пред две години, кога Данска и Германија беа домаќини, ја бранат Данците, кои на свој терен во Хернинг ги прегазија во финалето комшиите, ракометарите на Норвешка со 31:22. Франција стигна до бронзата по победата над Германија со 26:25. Карактеристично за ова натпреварување е што скоро ниту една репрезентација нема да биде во најсилниот состав. Повредите ги десеткуваа селекциите и имаше откажувања поради страв од корона вирусот. Во тоа водеа ракометарите на европскиот шампион Кил. Секој селектор има 20 играчи во Египет, а во протоколот се 16. За време на шампионатот, секоја селекција може да замени пет ракометари од оригиналната листа на ИХФ од 35.