Хаос на Светското првенство во ракомет: отпаднаа и Американците

На неколку часа пред отворањето на Светското првенство во ракомет, репрезентацијата на САД отпадна поради коронавирусот. Ситуацијата во Египет изгледа хаотично. Американците го откажаа настапот затоа што имаат премногу заразени играчи, а на нивно место на турнирот во последен момент доаѓаат Швајцарците. 

Тимот на САД се подготвуваше за Светското првенство во Данска, а на првиот тест пред планираното патување доби 18 позитивни тестови. Меѓу заразените е и тренерот Роберт Хедин. Легендата на шведскиот ракомет и селектор на САД изјави дека неговите играчи плачеле кога дознале за резултатите од тестот. Потоа изјави: “Планираме да испратиме 12 играчи. Немаме воопшто здрави дефанзивци, но имаме голман. Морам да останам во Данска додека не добијам негативен резултат од тестот”.

По повторното тестирање, Американската ракометна федерација објави дека се откажуваат од настапот на Светското првенство. Америка последен пат играше на Светското првенство пред 20 години. 

Својот настап на Светското првенство во Египет го откажа и Чешка. На претпоследниот тест, Чесите добиле осум позитивни тестови за Ковид-19. Вчера биле спроведени нови тестови, точниот број на позитивни случаи не е објавен, но Чешка потврди дека не може да собере доволно играчи за да се натпреваруваат на турнирот. 

Македонија оди на турнирот како прва замена за Чешка. Критериумите за замена ги постави Светската ракометна федерација (ИХФ). Според правила на ИХФ, Европа има предност пред репрезентациите од другите континенти затоа што ги има актуелните светски шампиони, репрезентацијата на Данска. Македонија на тој начин оди на Светското првенство како најдобро пласирана светска репрезентација по Чешка, благодарение на 15-тото место од Европското првенство во 2020 година. 

Нашите ракометари се во групата Г. Првиот натпревар го играме против Шведска на 14 јануари, два дена подоцна се среќаваме со домаќинот Египет, а потоа, во последниот натпревар од првото коло играме против Чиле.