Наскоро започнува снимање на серија за Sex Pistols
Американската телевизиска групација FX објави дека во март 2021 година ќе започнат да снимаат серија за култната британска панк-група Sex Pistols.
Според BBC, сценариото на серијата едноставно наречена „Pistol“ се базира на мемоарите на гитаристот на Sex Pistols, Steve Jones, а во главните улоги ќе играат Anson Boon, кој ќе го толкува John Lydon, додека Louis Partridge ја доби улогата на Sid Vicious.
Sвездата на „Game of Thrones“, Maisie Williams ќе ја игра манекенката Pamela Rooke, позната и како Jordan, која важи за една од одговорните за создавање и промовирање на панк стилот.
Американската телевизиска групација FX, која е исто така задолжена за снимање на серијата, објави дека серијата ќе има шест дела и снимањето треба да започне на крајот на март. Кога станува збор за продукција и режија на серијата, режисер ќе биде ни повеќе ни помалку, Danny Boyle. Откако дозна дека ќе биде одговорен за прикажување на приказната за култните Pistols, Boyle не можеше да го сокрие своето воодушевување.
“Моментот на доаѓањето на панкот, ги смени британското општество и култура засекогаш. Тоа беше точка на детонација за британската улична култура, кога обичните млади луѓе излегоа на сцената, го истресоа својот гнев и создадоа своја сопствена мода. Сите се плашеа од нив, но сепак ги следеа”, – изјави Boyle.
Boyle режираше голем број успешни филмови како што се „Slumdog Millionaire“, „Steve Jobs“, „Yesterday“, „28 Days Later“ и „The Beach“, но кај филмскиот аудиториум најдобро е запаметен по неговиот филм „Trainspotting“, кој се смета за едно од најважните филмски остварувања во текот на 90-тите години на минатиот век.
