Со неа денес знаеме сè: Википедија полни 20 години

Википедија во моментов има повеќе од 55,5 милиони статии на 306 јазици

Википедија на 15 јануари ќе одбележи 20 години постоење, а овој пат собирот на волонтери, соработници и партнери по повод јубилејот ќе биде организиран онлајн. 

Википедија е создадена на 15 јануари 2001 година на англиски јазик и е основана од Џими Вејлс и Лери Сангер, а сега со неа раководи Фондацијата Викимедија.

Википедија во моментов има повеќе од 55,5 милиони статии на 306 јазици, од кои повеќе од 6,2 милиони се на англиски јазик. 

Клучен фактор за успехот на Википедија се волонтерите кои пишуваат статии ширум светот. Википедија во моментов е меѓу 13-те најпосетувани страници во светот, и е рангирана на првото место според посетеноста како непрофитна страница, се вели во соопштението. 

Јубилејната прослава ќе се организира преку платформата Зум на 15 јануари од 18:30 часот. За време на прославата, ќе се зборува за потеклото на Википедија, местото што го зазема во денешниот свет, а ќе бидат презентирани и голем број интересни статистички податоци.