Имунитетот најчесто останува силен најмалку осум месеци по закрепнувањето од короната

Човечкото тело обично задржува силен имунолошки одговор на коронавирусот најмалку осум месеци по инфекцијата, а потенцијално и подолго, велат научниците во студијата објавена во списанието Science. 

Нивната анализа покажа дека околу 90 проценти од испитаните пациенти развиле долготраен и стабилен имунитет откако се опоравиле од короната, пренесува Washington Post.

Едно од најчестите прашања во врска со коронавирусот, кое се појави пред повеќе од една година, беше дали луѓето можат повторно да се заразат и, ако е така, колку брзо. Постојат изолирани извештаи за луѓе кои неколку пати заболеле од Ковид-19, но новото истражување потврдува дека човечкото тело генерално задржува силен имунитет.

Испитувајќи ги примероците на скоро 200 пациенти, истражувачите откриле дека човечкото тело го задржува, така да се каже, споменот за короната и е подготвено брзо да создаде контранапад ако е повторно изложено на вирусот. 

Новото истражување доаѓа во време на зголемена загриженост во врска со новите видови или мутации на коронавирусот, вклучувајќи ги пред се оние идентификувани во Велика Британија и Јужна Африка. Од вчера е забележан нов вид на коронавирусот  во седум држави во САД. 

Научниците генерално се оптимисти дека човечкиот имунитет може да одговори на новите варијанти на коронавирусот. Сепак, додаваат дека нема простор за ризик. Затоа, научниците ширум светот проучуваат нови мутации со цел да и обезбедат на јавноста детални податоци за нивните ефекти врз човечкото тело, но и за ефектите врз произведените вакцини.