Најважна новогодишна одлука: шетајте

Ако го прашате вашиот лекар кој вид рекреација е најдобар, одговорот ќе биде – брзо одење. 

Затоа, искористете го слободното време да пешачите барем половина час на ден, бидејќи тоа може да ја зачува вашата виталност, без оглед на возраста. 

Одењето е најприродната форма на движење. Оваа активност ги штити зглобовите од распаѓање, и спречува таложење на вишок килограми. Редовното одење го намалува појавувањето на проширени вени, ја стимулира циркулацијата, ја релаксира психата, го подобрува варењето и го одржува нивото на шеќер во крвта во нормални граници.

Експертите препорачуваат пешачење, особено сега во деновите на пандемија, бидејќи позитивно влијае на расположението, скоро исто како и употребата на антидепресиви. За време на одењето, се лачи хормонот серотонин, попознат како хормон на среќата. Англиски научници утврдиле дека одењето помага да се врати изгубената самодоверба. 

Получасовно пешачење во природа ја намалува депресијата кај 70% од депресивните луѓе, а кај 90% од нив се зголемува самодовербата.