Асанж нема да биде екстрадиран во Америка

Основачот на Викиликс, Џулијан Асанж нема да биде екстрадиран во САД под обвинение дека бил шпион, изјави денеска британската судијка Ванеса Барајтсер, објаснувајќи дека тоа би било репресивна мерка поради неговата психичка состојба. 

Барајтсер денес изјави дека Асанж најверојатно ќе изврши самоубиство доколку биде испратен во САД, објави АП. 

Владата на САД соопшти дека ќе се жали на пресудата. 

Обвинителството во САД го обвини Асанж со 17 точки од обвинението и една точка за злоупотреба на употреба на компјутери околу публикацијата Викиликс, во која тој објави воени и дипломатски документи пред една деценија. 

Овие обвиненија носат потенцијална затворска казна од 175 години затвор.

Адвокатите на обвинетиот Австралиец го бранеа Асанж со аргументи дека тој се однесувал како новинар и се повикал на Првиот амандман, кој особено ја нагласува слободата на говорот за објавување на документи што ги откриваат незаконските дејствија на американската армија во Ирак и Авганистан.