Шефот на BioNTech: Убеден сум дека нашата вакцина е ефикасна против новиот вид

Шефот на BioNTech, Угур Сахин, денес изјави дека е убеден дека вакцината развиена од неговата компанија заедно со Pfizer против Ковид 19 е ефикасна против новиот вид на коронавирус што се појави во Велика Британија. 

Тој за Билд ТВ изјави дека компанијата ќе ја испита мутацијата во наредните денови. 

Новиот вид откриен во Велика Британија се покажа како доста заразен, но британските анализи тврдат дека не предизвикува потешка форма на болест или поголема смртност. 

Земјите ширум светот ги затворија своите граници кон Велика Британија во понеделникот поради страв од ширење на новиот вид, што предизвика хаос во транспортот. 

Сахин зборуваше кратко откако ЕУ даде зелено светло на вакцината на Pfizer и BioNTech. 

Шефот на BioNTech беше прилично мирен, а таква е и пораката од прес-конференцијата на Светската здравствена организација, која предупреди да не се паничи бидејќи ова е нормална фаза во еволуцијата на пандемијата, пренсува Ројтерс. 

Сахин изјави дека сè уште не е вакциниран, но дека би сакал да го стори тоа. Поважно е, рече тој, неговите вработени да бидат вакцинирани за да можат да продолжат да работат нормално.