Твитер во борбата против антиваксерите

Социјалната мрежа Твитер се приклучи на војната против дезинформациите за вакцинацијата против коронавирусот и од денес ќе започне да ги брише најштетните дезинформации за вакцинацијата и вакцината, а исто така објави дека твитовите што содржат неверодостојни информации ќе бидат посебно обележани. 

Твитер соопшти дека новите правила се воведуваат „затоа што во светлото на глобалната пандемија, дезинформациите за вакцините претставуваат значителна и растечка закана за јавното здравје“. 

“Фокусирани сме на неутрализирање на погрешни информации што потенцијално можат да предизвикаат најсериозна штета на здравјето и благосостојбата на луѓето. Имаме важна улога како место каде што луѓето со добра волја дискутираат и разговараат за клучните здравствени проблеми”, се вели во соопштението на Твитер.

Со најновите проширени правила во борбата против дезинформациите, Твитер го следи примерот на платформите како Фејсбук и Јутјуб, кои веќе донеле слични одлуки.

Фејсбук веќе спроведува политика за отстранување на пораки со лажни информации за коронавирусот што може да предизвика „неизбежна физичка штета“. 

На почетокот на овој месец, ја прошириja таа политика на публикации со тврдења за вакцината кои недвосмислено ги побија експертите, како што се теории на заговор, како оние за микрочипови или лажни тврдења за безбедноста, ефикасноста, состојките или несаканите ефекти на вакцината. 

YouTube започна со ова уште порано, така што од октомври ги брише и блокира дезинформациите за тогаш потенцијалните вакцини.