Пол Макартни го издаде својот 18-ти соло-албум

Иконата на поп-рок културата и легендата на Битлси, Пол Макартни, го издаде својот 18-ти соло-албум, на кој се наоѓаат 11 нови песни, a тој се пофали и со видео запис во кој свири неколку инструменти додека работи на албумот. 

Како и на претходните два соло албуми од едицијата McCartney, Пол сите иснтрументи си свири сам, што го покажа на официјалната веб-страница каде објави видео од снимањето на песната „Find My Way“, која се наоѓа на новиот албум. Новиот албум „McCartney III“ е воедно и последниот од неговата трилогија, кој започна со албумот „McCartney“ во 1970 година и продолжи во 1980 година со албумот „McCartney II“.

„Секој ден започнував со снимање на инструментот на кој ја имав напишано песната и постепено правев нови слоеви, што беше многу забавно. Правев музика за себе, а не за некоја цел. Правев работи што сакам да ги правам и не знаев дека ќе завршат како албум“, изјави Мекартни во пресрет на издавањето на албумот.