Гејтс: Кафулињата и рестораните да се затвораат на 4-6 месеци, нема враќање во нормала до 2022 година.

Коосновачот на Мајкрософт Бил Гејтс верува дека враќањето во нормала за САД е подалеку отколку што луѓето очекуваат и покрај вакцината против Ковид-19, која беше одобрена и дистрибуирана оваа недела. 

Гејтс, кој донираше милиони за вакцинација преку неговите фондации, рече дека до летото 2021 година, САД треба да бидат „многу поблиску до нормалата отколку што сме сега“, но дека целосното враќање во нормала е веројатно можно само по 2022 година. 

Милијардерот за CNN изјави дека постои ризик од враќање на вирусот „ако не им се помогне на другите земји да се ослободат од болеста и ако стапките на вакцинација во САД не се високи“.

Гејтс верува дека треба да продолжи забраната за големи јавни собири и рече дека „за жал, повеќето кафулиња и ресторани во земјата треба да бидат затворени за да се запре стапката на инфекција“. Тој рече дека кафулињата и рестораните во САД треба да бидат затворени во следните четири до шест месеци. Вистинското враќање во нормала, смета тој, е можно само по 12-18 месеци доколку се направи се што е потребно за борба против инфекцијата. 

Гејтс изрази загриженост и за неподготвеноста на претседателот Доналд Трамп да ги признае претседателските избори, за кој тврди дека ја отежнува дистрибуцијата на вакцините. 

„Преминот на власта го комплицира ова, но новата администрација е подготвена да се потпре на вистинските експерти отколку да ги напаѓа нив“, изјави технолошкиот магнат.