Издадено е предупредување дека не може секој да ја прими Фајзеровата вакцина против Ковид-19

Здравствено регулаторно тело на Велика Британија ги предупреди луѓето кои имаат историја на сериозни алергиски реакции дека засега не треба да примаат вакцина на Фајзер против корона, бидејќи во вторникот две лица имале алергиски реакции, објави денеска Националната здравствена служба (NHS). 

Двајца членови на NHS, кои ја примиле вакцината првиот ден од масовната вакцинација во Велика Британија, добиле алергиска реакција, објави Гардијан. 

Затоа, Здравствениот регулаторен орган (MHRA) предупреди дека секој што има посилни алергиски реакции на лекови, храна или вакцини, не треба да прими вакцина на Фајзер.

NHS во Англија ги извести сите пунктови за вакцинација за ова предупредување. 

Ова значи дека секој што е на програмата да прими вакцина деновиве ќе биде прашан дали претходно имал проблеми со алергиски реакции. 

Професорот Стивен Пауис, еден од директорите во NHS за Англија, рече дека MHRA дале ваков совет како претпазливост, бидејќи две лица добила алергиска реакција во вторникот. „Двете лица се добро и се опоравуваат“, додаде тој. 

Велика Британија е првата земја во светот што одобри употреба на вакцината на Фејзер против корона вирусот.