Луѓето без симптоми на корона се 42% помалку заразни

Асимптоматските случаи на коронавирус продолжуваат да бидат енигма за научниците, но од универзитетот во Голд Коуст во Австралија, во поширокиот регион Бризбејн, заклучија дека асимптоматските луѓе имаат 42 проценти помали шанси да пренесат Ковид-19. 

Според истражувањето спроведено од Оџунгерел Бјамбасурен, истражувач од Универзитетот Бонд во Голд Коуст, луѓето кои имаат корона, но немаат симптоми, имаат значително помала веројатност да ја пренесат инфекцијата на друго лице. 

Мета-анализата, која опфатила 13 студии и 21.708 случаи, покажала дека 17 проценти од заболените немале симптоми на Ковид 19, додека во некои претходни студии се спомнува дека бројот може да се искачи до 81 процент, објави nature.com.

Истражувачки тим од Женева се обиде да утврди колкава е заразноста кај луѓето што живеат во едно домаќинство. 

Нивниот заклучок е дека лице без симптоми кое е позитивно на Ковид 19 има за четвртина помалку шанси да го пренесе вирусот, во споредба со лице кое покажало симптоми. 

“Ако асимптоматските случаи навистина слабо го пренесуваат Ковид-19, тогаш тие не се тајни носители на вирусот. Тие не кашлаат, киваат и веројатно не оставаат патогени микроорганизми на различни површини, како што тоа можат да сторат пациенти со симптоми”, рече Бјамбасурен.