Вакцината во Велика Британија достапна од вторник

Велика Британија ќе биде првата земја чии граѓани ќе добијат вакцина против коронавирус, а првите дози ќе бидат достапни од вторник, прво во болниците, а потоа и во другите здравствени установи. 

Вакцината најпрво ќе ја примаат лица постари од 80 години, здравствени работници, негуватели и штитеници во домови за стари лица, објави Националната здравствена служба. 

Велика Британија минатата среда по итна постапка ја одобри вакцината Фајзер/Бајонтек. Нарачани се околу 40 милиони дози, а бидејќи на сите им требаат две, се проценува дека 20 од 67 милиони жители ќе бидат вакцинирани, пренесува Ројтерс.

Околу 800.000 дози ќе бидат достапни во првата недела, а вакцините веќе пристигнаа од Белгија и се чуваат на безбедни локации каде се проверува нивниот квалитет, објави британското Министерство за здравство.