Бил Гејтс: Следните четири или пет месеци ќе бидат доста тешки

Бил Гејтс, коосновачот на Мајкрософт и еден од најбогатите луѓе во светот, очекува дека состојбата во САД ќе се нормализира до пролетта следната година. 

„Следните четири или пет месеци ќе бидат доста тешки, освен ако не ги удвоиме нашите напори и не станеме сериозни“, изјави Гејтс за NBC News.

Тој истакна дека само одговорното однесување може да придонесе за сузбивање на пандемијата и додаде дека затоа е потребно дополнително да се намали бројот на физички контакти и да се носи заштитна маска секаде каде што постои опасност од инфекција.

Тој верува дека епидемиолошката состојба ќе се подобри со помош на напредни медицински третмани и, како што рече, „неверојатни“ вакцини. 

Гејтс се надева дека луѓето кои се во дилема дали да примат вакцина против коронавирус, ќе бидат охрабрени по податоците за позитивните искуства и дека тоа навистина помага.