Нов вид на мерка: Една земја во Европа сега размислува да воведе четиридневна работна недела

Шпанската влада ја разгледува можноста за воведување на четиридневна работна недела, односно намалено работно време, со цел да се спречи падот на вработеноста. 

Лидерот на левичарската партија Унидас Подемос, Пабло Иглесијас изјави дека владата го разгледува предлогот за намалување на работното време со цел да се поттикне вработувањето. 

Идејата за пократка работна недела ја слушаме ширум светот со години наназад, но пандемијата на корона вирусот и неговото влијание врз вработувањето натера многумина да размислат за економијата и социјалните структури, пишува американската агенција Блумберг.

Многу компании за време на пандемијата испраќаа работници на принуден одмор, а некои дури отпуштаа вработени. 

Владата ќе претстави предлог за промена на работната недела во Шпанија во рамките на социјалниот дијалог со синдикатите и здруженијата на работодавачи.