Синот на Шумахер пристигнува во Формула 1

Мик Шумахер, син на седумкратниот шампион во Формула 1, Михаел Шумахер, потпиша за тимот на Хаас за следната сезона.

Американскиот тим објави дека 21-годишниот Мик потпишал повеќегодишен договор и ќе биде дел од тимот во кој е и Русинот Никита Мазепин. Мик Шумахер досега беше возач на Академијата Ферари и возеше трки во Формула 2.

“Немам зборови … Ви благодарам Хаас за довербата, ви благодарам Ферари за можноста. Им благодарам и на моите родители на кои им должам сè. Отсекогаш верував дека мојот сон ќе се оствари и дека ќе возам во Формула 1. Ќе дадам се од себе, како и секогаш“, изјави Мик Шумахер.

Оваа сезона, Мик Шумахер е најдобар возач на Формула 2 со 14 поени повеќе од Британецот Калум Илото и 43 повеќе од идниот тимски колега Мазепин. Претходно го освои Европското првенство во Формула 3.

Мик е трет член на семејството Шумахер во Формула 1. Со седум шампионски титули и 91 победа, Мајкл е втор најтрофеен после Луис Хамилтон, а чичкото на Мик, Ралф возеше на 180 трки од 1997 до 2007 година. Состојбата на Михаел Шумахер, кој беше сериозно повреден при скијање пред седум години, сè уште е непозната за јавноста.

“Секако дека Мајкл од кревет ги гледа трките на Мик. Што се однесува до неговото здравје, ќе бидам резервиран таму. Го гледам еднаш или двапати месечно и можам само да кажам дека сè уште се бори”, откри поранешниот шеф на Ферари, Жан Тод.

Хаас, партнерот на Ферари, освои само три бода оваа сезона и е претпоследен тим во шампионатот.