Вакцината на Оксфорд е ефикасна 90 проценти само кај помлади од 55 години

Оксфордската вакцина против коронавирусот, која заеднички ја развиваат АстраЗенека и Универзитетот Оксфорд, е ефикасна за 90 проценти само кај лица помлади од 55 години, изјави шефот на американската програма за вакцина против коронавирус, Монсеф Слауи.

Слауи изјави дека ефикасноста на оваа вакцина кај целата група испитаници, без оглед на возраста, е 62 проценти, додека ефикасноста од 90 проценти е забележана само кај учесници помлади од 55 години и дека просечната ефикасност е 70 проценти, објави Блумберг.

„Постојат бројни варијации што треба да ги разбереме и каква е нивната улога во различната ефикасност“, изјави тој.

Компанијата АстраЗенека објави дека наскоро ќе ги објави податоците од студијата по стручните рецензии. Акциите на компанијата оттогаш паднаа за 2,2 проценти на берзата.

Претходно, АстраЗенека ги објави резултатите од третата фаза од клиничкото испитување на вакцината, според која ефикасноста на вакцината е 90 и 62 проценти, во зависност од примените дози.

Сепак, деталите за оваа студија покренаа бројни прашања кај експертите, бидејќи не е објавено како таа влијае на различни возрасни групи или каква е разликата помеѓу приемот на една или две дози на вакцина.