Времен сообраќаен режим на ул. „Благоја Стефковски“

Град Скопје ги известува граѓаните дека поради градежни активности за реконструкција на ул. „Благоја Стефковски“ (фаза 2 и 3), петок 20.11.2020 година, па се до завршување на работите во недела на 22.11.2020 година, на потегот од кај црквата св. „Спас“ во Маџари се до после железничкиот премин (пруга) кон Трубарево, на оваа улица ќе биде воведен времен сообраќаен режим.

Целосното затворањето на улицата за сообраќај ќе се реализира по одреден редослед се со цел да се обезбеди одредено минимално движење по истата траса:

-За петок 20.11.2020 година предвидено е затворање на потегот од железничката рампа и пруга Скопје – Белград (гледано од правец Центар на Скопје – Трубарево), со што ќе се остави можност за премин од Маџари кон Илинден.

-За сабота 21.11.2020 и недела 22.11.2020 година предвидено е затворање на потегот од црквата св. „Спас“ во Маџари се до железничкиот премин (пруга), со што ќе се остави можност за премин од Илинден кон Трубарево и обратно.

Во координација со Македонски железници ќе се изврши асфалтирање на железничкиот колосек Скопје – Белград кој поминува попречно на ул. Благоја Стефковски. Како алтернативни рути треба да се користат бул. Александар Македонски и автопатот до клучка кај Хотел Белви и автопатот до клучка Идризово (односно Кадино), како и рутата преку Јурумлери до Лисиче.

Апелираме до сите учесници во сообраќајот да бидат внимателни и да ја прилагодат својата брзина на движење според условите на патот, како и да ја искористат околната улична мрежа за да стигнат до посакуваните дестинации.