НОВИ СТАНДАРДИ ЗА ХУМАН ТРЕТМАН НА БЕЗДОМНИТЕ КУЧИЊА – ЈП ЛАЈКА – СКОПЈЕ
Прифатилиштето на ЈП Лајка – Скопје активно работи за згрижување на бездомните кучиња и нивен хуман третман. Тим од сертифицирани професионалци започна со заловување на бездомните кучиња низ градот Скопје и нивно сместување во суви и топли апартмани со подно греење и легла според сите стандарди, под редовна контрола, третман и нега од страна на негувателите во Лајка. По задолжителниот преглед, вакцинација, стерилизација и чипирање, односно по нивното заздравување откако ќе завршат со постперативниот третман, ќе бидат сместени во одделот за вдомување каде граѓаните ќе имаат можност да си го вдомат својот иден миленик.
Досега во прифатилиштето на ЈП Лајка – Скопје се згрижени 23 бездомни кучиња од улиците на град Скопје. Дел од нив се заловени од нашите тимови по пријава на граѓани дека се агресивни, а дел од кучињата се донесени од граѓани на кои што неизмерно им благодариме за соработката.
Резултатите од нивните тестови од лишманија од Факултетот за ветеринарна медицина се негативни и сите се во добра здравствена состојба. Половина од нив веќе го поминаа третманот односно се стрелизирани/кастрирани, вакцинирани од заразни болести и беснило, имаат аплицирано ушна маркица и микрочип кои што се евидентирани со кооринатите од каде што се заловени. Новите ушн маркици имаат посебен број и код според општината.
Прифатилиптето на ЈП Лајка работи во полн капацитет за во целост да ја промени сликата со бездомните кучиња, нападнати и искасани граѓани. Не само за поголема безбедност на граѓаните, туку и подобар живот и хуман третман на кучињата во Скопје.
Проблемот со бездомните кучиња во главниот град полека, но сигурно станува минато и прифатилиштето на ЈП Лајка ќе настојува да прерасне во најубавото катче во градот за дружба меѓу граѓаните и нивниот најголем пријател – кучето.
Целиот хуман третман кој вклучува: крвна слика, 4Д тест, тест за лишманија по единствена акредитирана метода (кој е задолжителен согласно годишната наредба на Агенцијата за храна и ветеринарство), терапија против внатрешни и надворешни паразити, вакцинација против заразни болести и беснило, кастрација/стерилизација, микрочипирање, обележување со ушна маркица, престој и ресоцијализација е бесплатен за сите бездомни кучиња над 7 месечна возраст кои се предмет на работата на претпријатието и кои се наоѓаат на територијата на град Скопје.
