OFFEST 2020: ИСТОРИСКО ФИНАЛЕ СО ДУЕТОТ КЕЈХАН КАЛХОР И ЕРДАЛ ЕРЗИНЏАН

Вечерва, во рамките на последната вечер на 19. OFFest, ќе се одржи еден од најпосакуваните концерти во историјата на нашиот најголем и најзначаен фестивал на музика на светот. Во Македонската филхармонија, со почеток во 19 часот, ќе настапи виртуозното дуо на иранскиот маестро Кејхан Калхор (Kayhan Kalhor) и брилијантниот турски инструменталист Ердал Ерзинџан  (Erdal Erzincan). Ова е нивно прво претставување пред македонската публика.

Добитникот на наградата Греми и наградата Womex Artist Award за 2019 година Кејхан Калхор (Kayhan Kalhor) се смета за најголемиот светски мајстор на иранското ќемане (персиска виолина). Меѓу сите негови бројни проекти и уникатни соработки што го привлекoa вниманието на публиката низ целиот свет, секако едно од највозбудливите е дуото со познатиот турски виртуоз на инструментот баглама Ердал Ерзинџан (Erdal Erzincan). Нивниот заеднички албум “The Wind” беше објавен за ECM во 2006 година и оттогаш оваа соработка е непрекината и жива. Класичните музички традиции на Персија и на Отоманска Турција што ја инспирираат музиката на Калхор и Ерзинџан имаат многу заеднички нешта, вклучувајќи го и древниот модален композициски систем познат како „макам“, а идејата за импровизација игра огромна улога во нивните духовно и емотивно моќни настапи. Нивната музика е сосема модерна и настојува да го вовлече слушателот во своето кралство на трансот, со преплетување на екстатичните ритми и сензуалните мелодични фрази. Резултатот е збир на инструментални композиции коишто се влеваат една во друга како едно континуирано дело, со нежно лебдечки премини во кои двата инструмента одекнуваат и импровизираат на различни фрази.

Имајќи го предвид ограничениот капацитет на салата (30%) во услови на пандемија, организаторот „Скопски џез фестивал“ и за овој настап – како и за сите претходни од програмата на OFFest 2020 – успеа да обезбеди бесплатен лајв стриминг / пренос во живо преку фејсбук и јутјуб каналите на фестивалот.

Линкови за онлајн следење на концертот на Кејхан Калхор и Ердал Ерзинџан:

facebook: https://www.facebook.com/OFFest/posts/3509918729085811
youtube: https://www.youtube.com/watch?v=3OeWlnDA5V8

Влезните билети за оваа вечер се во продажба, исклучиво онлајн, преку продажната мрежа на mk.tickets. Годинешниот OFFest се одвива целосно во согласност со протоколот за одржување на концерти во затворен простор. Следејќи ги последните препораки на Комисијата за заразни болести, почетокот на концертот на Кејхан Калхор и Ердал Ерзинџан е закажан за 19:00 часот.

Сите детали околу OFFest може да ги најдете на http://www.offest.com.mk 
Инфо за билетите на http://www.offest.com.mk/tickets.html
facebook event: https://www.facebook.com/events/378009660071050/