Бајден е новиот претседател на САД
Џо Бајден е избран за 46-ти претседател на САД откако го победи републиканецот Доналд Трамп.
По четири дена напнато пребројување на гласовите, поранешниот потпретседател на Барак Обама го премина „магичниот“ праг од 270 изборни гласови, објавија американските мрежи CNN, NBC и CBS.
На 20 јануари 2021 година, Бајден ќе положи заклетва како 46-ти претседател на САД.
Неговата потпретседателка, Камала Харис, ќе влезе во историјата како прва потпретседателка и како прва афро-американка на таа функција.
Доналд Трамп, кој се кандидираше за втор четиригодишен мандат, не сака да го признае поразот и ветува вистинска судска војна.
Во саботата попладне беше објавено дека Бајден ја освои Пенсилванија, сојузна држава што носи 20 изборни гласови. Со тоа собра 284 изборни гласови, што е доволно за да победи. Малку подоцна, AП објави дека Бајден ја освоил Невада како што се очекуваше, па неговата победа е уште поубедлива, тој сега има 290 изборни гласови.
