Бајден направи пресврт во Пенсилванија

Демократскиот кандидат Џо Бајден го презеде водството пред актуелниот претседател Доналд Трамп во Пенсилванија, федерална држава, која му е доволна за да победи на претседателските избори и да влезе во Белата куќа, додека броењето на гласовите продолжува по изборите кои се одржаа во вторникот.

Според американските медиуми, во моментов Бајден има предност пред Трамп во Пенсилванија од 5.587 гласови.

Победа во таа држава ќе му донесе на Бајден 20 изборни гласови, надминувајќи ја магичната граница од 270. Бајден досега има 253 или 264 изборни гласови затоа што некои медиуми веќе ја признаваат Аризона, а некои не. Трамп стои на 214.

Демократскиот кандидат, исто така, го презеде водството во Џорџија, со нешто повеќе од 1.000 гласови.

Патот на Трамп да остане во Белата куќа сега изгледа далеку потежок: тој мора да ги освои Пенсилванија и Џорџија и да го помине Бајден или во Невада или во Аризона. Бајден ја задржа и малата предност во Аризона и Невада. Во Аризона, тој води со околу 47.000 гласови, а во Невада со околу 11.500 гласови.