Белгија ги затвори познатите продавници за чоколади, но не и книжарниците

Во строгиот центар на Брисел, еден вид продавници не е заклучен дури и среде пандемија, а тоа се книжарниците.

Познатите белгиски продавници за чоколади и пабови ќе останат затворени барем до декември, но сопственикот на книжарницата Марк Ел Хадем вели дека ништо не може да ја запре продажбата на она што Белгија го смета за „витална важност“.

„Во ерата на вознемиреност и несигурност, книгата е најдобрата храна за душата и стимул за размислување“, вели Ел Хадем.

Отворените белгиски книжарници се целосно спротивни од оние во Франција, каде што нивното затворање предизвика бес и протести.

– Читањето во „lockdown“ е од витално значење, тврди Франсоа Белет, пензионер од Брисел, кој собрал голем број книги кои има намера да ги прочита до крајот на месецот. Тој не може да ја разбере одлуката да се затворат книжарниците во Франција.

– Ова покажува дека властите не се заинтересирани за книгите. Тоа е патување до пеколот, и тоа во Франција, најлитературната земја во светот. Ние сочувствуваме, апсолутно сме солидарни со нашите француски колеги и оние за кои читањето е важно – додаде тој.

Болниците во Белгија, земја со 11,5 милиони жители, во моментов имаат повеќе од 6.000 луѓе заболени со Ковид-19 и неодамна беа воведени строги рестриктивни мерки за спречување на понатамошното ширење на вирусот.