Престојот во природа ја намалува желбата за пушење и алкохол

Луѓето кои имаат пристап или живеат во близина на зелените области имаат помала веројатност да пушат или да продолжат со пушењето, покажува новото британско истражување чии резултати беа објавени во списанието „Social Science & Medicine“.
Резултатите од студијата спроведена меѓу 8.000 Британци ја поврзуваат близината и пристапот до зелените површини со намалената веројатност дека некое лице ќе стане пушач и поголема веројатност дека успешно ќе се ослободи од оваа лоша навика.
Студијата покажа дека луѓето кои пушат имаат 12 проценти поголема веројатност да се откажат ако живеат во близина на зелените површини.

Резултатите од истражувањето спроведено од научници од универзитетите во Плимут, Ексетер и Виена не се сменија дури и кога беа земени предвид социо-економскиот статус на учесниците и нивното ризично здравствено однесување.

Претходните студии на истите научници покажаа дека самиот поглед на природата и зелениот предел ја намалува желбата на поединците за алкохол, цигари и нездрава храна.
Исто така, постојат претходни докази дека набудувањето на природата го намалува нивото на стрес и ја зголемува благосостојбата на човекот.

Авторите на студијата истакнуваат дека ова е прво истражување кое експлицитно го поврзува „влијанието на зелените површини во животната средина со намалување на нездравиот начин на живот“, изјави Сабин Пал, коавтор на студијата и специјалист по урбана и еколошка психологија на Универзитетот во Виена.

Таа и нејзините колеги сметаат дека зголемувањето на бројот на зелени површини може да прерасне во поефикасна стратегија за јавно здравје и значително да придонесе за намалување на бројот на пушачи во општеството.