OFFEST 2020 СТАРТУВА СО СИЛВИЈА ПЕРЕЗ КРУЗ
Првиот во низата концерти на 19. OFFest, нашиот најголем и најзначаен фестивал на музика на светот, што годинава ќе се одржи во ноември, е настапот на фасцинантната каталонска пејачка Силвија Перез Круз (Sílvia Pérez Cruz). Таа, на 3 ноември во Македонската филхармонија во Скопје, ќе го претстави својот најнов проект „Фарса” (Farsa), во кој на волшебен начин ги комбинира музиката, театарот, филмот, танцот, сликарството, фотографијата и поезијата.
Силвија Перез Круз, еднакво позната во џез, фадо и во фламенко круговите, со текот на годините прерасна во исклучителен музички раскажувач. Растела во музичко семејство, изучувајќи џез пеење, пијано и саксофон. За време на студиите во Барцелона, заедно со три пријателки, ја формира фламенко групата Las Migas, којашто добива сериозно внимание и огромна популарност низ цела Шпанија. Нејзината соло кариера, пак, започнува на 27-годишна возраст, компонирајќи своја музика и развивајќи индивидуален стилски израз. Пее претежно на шпански, каталонски и португалски, а има соработувано со артисти како Joan Manuel Serrat, Jorge Drexler, Natalia Lafourcade, Gino Paoli, Javier Colina, Hamilton de Holanda, Rocío Molina, Toquinho, Marco Mezquida, Raül Refree и многу други. Зад себе има 6 албуми, од кои два станаа „златни“ (“11 de Novembre” и “Granada”). Во исто време, редовно пишува музика за филм, театар и танцова продукција, за што има добиено бројни награди. Се чини дека постои консензус околу една работа кога станува збор за нејзините настапи: без разлика дали пее свои песни или преработки, нови или стари композиции, на овој или оној јазик, на сцената секогаш на крајот доминира еден јазик – јазикот на емоциите.
Нејзиниот нов проект „Фарса“ е сочинет од песни што таа ги напиша во соработка со други уметници и уметнички дисциплини: театар, филм, танц, сликарство, фотографија и поезија. Последните примери (сите од 2018) ги наоѓаме во филмот „Дванаесетгодишна ноќ“ (La noche de 12 años), потоа во оригиналната музика за делото „Grito Pelao“ со танчерката Росио Молина, како и во нејзините композиции за претставата „Сирано“ (Cyrano) со Lluís Homar. Во воспоставувањето на усогласеност помеѓу интердисциплинарниот дијалог и чувството на единство на проектот, значајна улога игра и фотографијата – за секоја од песните таа користи различна насловна фотографија. Силвија, едновремено, го позајмува својот лик за потребите на артистичкиот мејкап, нејзиното лице служи како сликарско платно, директно инспирирано од музиката.
Влезните билети за концертот на Силвија Перез Круз се веќе во продажба, исклучиво онлајн, преку продажната мрежа на mk.tickets. Наскоро ќе биде објавена и комплетната програмата на фестивалот, кој годинава, разбирливо, ќе се реализира во согласност со протоколот за одржување на концерти во затворен простор. Несомнено, нè очекува уште едно извонредно квалитетно, музички раскошно и возбудливо издание на OFFest.
Сите детали околу OFFest може да ги најдете на http://www.offest.com.mk
Инфо за билетите на http://www.offest.com.mk/tickets.html
facebook event: https://www.facebook.com/events/993357961160499
