Едно од ретките места во светот без корона ги забележа првите два случаи

Маршалските острови, едно од последните места во светот недопрени од коронавирусот, ги забележаа првите два позитивни случаи, објавува Би-Би-Си.

Владата на тој пацифички архипелаг објави дека двајца работници од САД биле позитивни на коронавирус откако во вторникот пристигнале од Хаваи.

Парот пристигнал со воен лет и од моментот кога дознале дека се позитивни, биле ставени во карантин, а и двајцата се асимптоматски случаи, објави хрватскиот портал Индекс.

Маршалските острови ги затворија границите уште во март за да спречат продирање на вирусот. Властите нагласија дека заразениот пар спаѓа во „строго гранични случаи“, и тие веднаш биле изолирани без опасност од понатамошно ширење на вирусот.

Властите додаваат дека безбедносните мерки обезбедиле тие да немаат контакт со луѓето на Маршалските острови.