Хамилтон: Никогаш не сонував дека ќе бидам таму каде што сум сега

Кога пред 13 години, победи за прв пат во својата кариера, на трката за Големата награда  на Канада, никој не можеше да претпостави дека е родена толкава ѕвезда во Формула 1.

Од вчера, Луис Хамилтон е сопственик на рекордот за кој сонуваа сите возачи – тој има најмногу победи во историјата на овој елитен спорт, една повеќе од Михаел Шумахер, за многумина најдобриот возач на сите времиња.

„Не знам ни дали можев да сонувам дека ќе бидам таму каде што сум сега”, изјави Хамилтон. Тој во Португалија ја оствари 92-та победа во кариерата во Формула 1, претежно како возач на Мерцедес, тим во кој е од 2013 година.

– Не морав да имам волшебна топка за да го направам најдобриот потег во спортскиот живот – да дојдам во Мерцедес. Сè што сакавме беше да бидеме подобри од ден на ден, заедно. Растевме заедно и ова е успех за целиот тим. Привилегија е да се работи во оваа средина – заклучи Хамилтон.