Почина волонтер кој учествувал во испитувања на вакцината против Ковид-19
Бразилските здравствени служби денес објавија дека починал волонтер кој учествувал во програмата за развој на вакцина против Ковид-19.
Тоа е вакцина на британско-шведската компанија Астра Зенека и Универзитетот во Оксфорд. Според новите информации, волонтерот бил дел од група која примила вакцина против менингитис.
Бразилскиот здравствен регулатор Анвис објави дека развојот на вакцината ќе продолжи и покрај смртта на волонтерот, објави Ројтерс.
Испитувањата на вакцината против Ковид-19 од страна на Астра Зенека и Универзитетот во Оксфорд во Бразил би биле прекинати доколку волонтерот, кој починал, бил дел од активната група, изјави извор запознаен со ситуацијата.
Овој коментар сугерира дека волонтерот бил дел од компаративна контролна група, на која и била дадена вакцина против менингитис, наведува Ројтерс.
Универзитетот во Сао Паоло во посебна изјава ја потврди смртта на волонтерот, во која се наведува дека станува збор за бразилски државјанин.
Универзитетот во Оксфорд исто така потврди дека ќе продолжи да работи на развој на вакцината и дека со независна истрага утврдено е дека нема причина за загриженост кога станува збор за безбедноста на програмата.
„По внимателно проучување на случајот во Бразил, утврдено е дека нема причина за загриженост кога станува збор за безбедноста на клиничкиот развој, а бразилскиот регулатор во независна истрага дошол до заклучок дека програмата треба да продолжи“, соопштуваат од Универзитетот во Оксфорд.
Универзитетот Оксфорд во септември објави дека тестирањето на вакцината за коронавирус во соработка со фармацевтската компанија Астра Зенека ќе продолжи откако беше запрено кога еден од волонтерите се разболе.
Третата фаза на клинички испитувања се спроведува во Бразил, Велика Британија, Индија и Јужна Африка.
