Руска вакцина „made in“: Индија, Бразил, Јужна Кореја, Кина …

Руската вакцина против коронавирусот “Спутник V” ќе се произведува во Индија, Бразил, Јужна Кореја и Кина, објави генералниот директор на рускиот фонд за директни инвестиции, Кирил Дмитријев.

„Потврдуваме дека ќе можеме да испорачаме големи количини во декември. Ќе ја произведуваме вакцината во Индија, Бразил, Кореја, Кина и во друга земја“, рече Дмитријев на онлајн конференција.

Портпаролот на Кремљ, Дмитриј Песков, претходно изјави дека вакцината „Спутник V“ е активно промовирана на светските пазари, по што побарувачката за неа е зголемена.

Тој исто така рече дека вакцината е промовирана на меѓународно ниво од Рускиот фонд за директни инвестиции, дека тие биле многу успешни и дека пристигнале голем број барања за вакцината.

Русија на 11 август објави дека регистрирала вакцина против коронавирусот „Спутник V“ што ја развива Центарот за истражување Гамалеја при Министерството за здравство и дека клиничките испитувања биле успешно завршени во јуни и јули.