Дури три милијарди луѓе во светот немаат услови да ги мијат рацете

Недостапноста до основната хигиена како миење раце за милиони луѓе ширум светот значи зголемен ризик од нов коронавирус и други заразни болести, предупреди Меѓународниот фонд за деца на Обединетите нации.

Според извештајот на УНИЦЕФ објавен по повод Светскиот ден на миењето на рацете, во најмалку развиените земји, скоро три четвртини од населението не може да ги мие рацете дома. Во Субсахарска Африка, 63 проценти од луѓето што живеат во урбани средини живеат без достапни основни хигиенски услови, како место за миење раце.

На глобално ниво, 43 проценти од училиштата, кои ги посетуваат 818 милиони ученици немаат можност да ги мијат рацете со вода и сапун. Во најсиромашните земји, процентот на училишта без место за миење раце е 70 проценти.

„Пандемијата дополнително ја потенцираше клучната улога на хигиената на рацете во спречувањето на болести“, рече Кели Ен Нејлор, извршна директорка на УНИЦЕФ за вода, санитација и хигиена.

„Неприфатливо е најранливите заедници да не се во можност да ги користат наједноставните методи за заштита на сопствените и животите на своите најблиски“, изјави Нејлор.