Прекинато е испитувањето на вакцината поради необјаснета болест

Американската компанија Johnson&Johnson привремено го прекина клиничкото испитување на потенцијална вакцина против коронавирусот поради необјаснетата болест на учесник во студијата, објави компанијата.

Во соопштението се посочува дека ваквите паузи се вообичаени за време на големи испитувања во кои може да учествуваат десетици илјади луѓе.

Ова е второ одложување на тестирањето на вакцините спроведено од неколку производители во светот, откако AstraZeneca ја паузираше доцната фаза на тестирање на својата експериментална вакцина, која се развива на Универзитетот во Оксфорд, исто така, поради болеста на учесник во студијата.

Испитувањата на вакцината во Велика Британија, Бразил, Јужна Африка и Индија продолжија, но во САД сè уште се во пауза.

Johnson&Johnson минатиот месец објавија дека нејзината експериментална вакцина против „Ковид-19“ произведува силен имунолошки одговор во раните и средните фази на испитувањето, по што започна последната фаза со 60.000 учесници, а резултатите се очекуваа подоцна оваа година или почетокот на следната.

(Tanjug)