Загадениот воздух го оштетува мозокот на младите: Загрижувачко откритие на научниците

Научниците во мозокот на млади починати лица откриле мали честички од загаден воздух, за кои велат дека можат да ги оштетат мозочните клетки на сличен начин како Алцхајмеровата и Паркинсоновата болест.

Истражувањето, објавено во списанието „Environmental Research“, ги анализирало мозочните состојби на 186 починати млади луѓе од Мексико Сити, на возраст од 11 месеци до 27 години. Во мозокот на секое починато лице, вклучено во истражувањето,  пронајдени се траги од загадувањето.

Овие загадени честички се наоѓале во областа на мозокот која е од клучно значење за развој на Паркинсонова болест, а научниците веруваат дека тие можеле да навлезат во човечкиот систем преку носот или преку цревата.

Оваа студија е сè уште во почетна фаза, изјави професорот од Универзитетот во Ланкастер и еден од авторите на истражувањето, Барбара Матер.

Таа за „Гардијан“ изјави дека резултатите од истражувањето ја поддржуваат теоријата дека постои директна врска помеѓу невродегенеративните болести и загадувањето.

Доколку оваа врска биде потврдена, тоа може да стане голема грижа за човештвото, имајќи предвид дека околу 90 проценти од луѓето на Земјата живеат во области каде што нивото на загадување на воздухот ги надминува границите утврдени од Светската здравствена организација.

Според извештајот на СЗО од 2016 година, околу три милиони смртни случаи годишно се поврзани со последиците од загадениот воздух.

Извор: sputniknews.com