Филмско враќање на Трамп во Белата куќа
Американскиот претседател Доналд Трамп беше пуштен од воената болница во понеделникот вечерта, каде три дена се лекуваше од Ковид-19 и се врати во Белата куќа.
Со маска на лицето и подигната тупаница, Трамп го напушти Националниот воено-медицински центар Валтер Рид и влезе во џипот, кој го однесе на воениот аеродром за краткиот лет назад кон Белата куќа.
На видеото објавено на социјалните мрежи, може да се види како Трамп слетува на тревникот во Белата куќа со хеликоптер, како ги поздравува собраните новинари и влегува, сето тоа проследено со драматична музичка позадина.
„Ви благодарам многу“, им рече 74-годишниот претседател на насобраните новинари, пренесува АП.
Дури и пред да излезе од болница, Трамп на Твитер објави дека наскоро и се враќа на својата кампања.
Откако ја напушти болницата, тој и се обрати на јавноста со нова порака на Твитер во која, меѓу другото, повтори дека „од коронавирусот не треба да се плашиме“.
“Се враќаме назад, се враќаме на работата. Како ваш водач, морав да го сторам тоа. Знаев дека постои опасност, но тоа е во ред. Секој лидер би го сторил истото како мене”, рече Трамп.
“Работните простории на Трамп ќе бидат лоцирани во привремена канцеларија, веднаш до болничкото крило на Белата куќа”, објави Си-Ен-Ен повикувајќи се на официјални извори.
