ЗАТВОРСКИ КАЗНИ ЗА НАСИЛСТВО ВРЗ ЖИВОТНИТЕ❗️❗️❗️(вознемирувачки фото/видеа)

Прободено куче со импровизиран колец; се изживувале со мачка и снимале; борби со кучиња и на Фејсбук; во Штип ветеринар се обидел да застрела жена која го засолнила маалското куче – добредојдовте во новото нормално во Македонија!

❗️ Во Бардовци со импровизиран колец смртно прободен Дино, големата бела добрина, маалски миленик. Душа испуштил во рацете на странски државјанин кој го познавал и хранел, кој е во најмала рака во таков шок поради кој, сме убедени, дека нема никогаш да го заборави впечатокот од Македонија. Куче прободено со колец во вратот е слика и прилика на нашата држава! Нудиме финансиска награда од 10 000 денари за сведоштво или доказ за сторителот на ова умоболие во Бардовци. Повторно потсетуваме, садистот способен за таков насилен акт врз невино животно е способен истото да го направи и на луѓе.

❗️ Убијци на животни на сите страни – дел од хоби, други платени за да убиваат! Во државава се случило и по некој функционер да сменат, ама деценија наназад ветеринар Крсто е „Бог и батина“, недопирлив, одговорен и платен за третман на кучињата во Штип, пријавуван во континуитет за мачење и убивање на животните, но него мува не го лази! Само еднаш симболично казнет за убиени кучиња (им ги врзал екстремитетите со јаже да не можат да се движат, а муцките со лепливи траки, без око да му трепне убил живи, здрави, мирни кучиња кои врискале од болка додека ветеринаров им ги наполнил вените со отров и фрлил да испуштаат душа во предградието на Штип; се заканувал на сто и еден начин на активисти, демнел активистка, убивал маалски миленици… За последно да се осмели да влета во дом на жена чие куче заловил и под наплив на бес да ја стрела со стрелките за омајување. Убаво читате, ветеринарот ја стрелал жената. Стрелката како доказ завршила во домот на жената, која го пријавила во МВР а за настанот вознемирена информира на фб: https://www.facebook.com/silvanka.daneva/posts/311720490127266 Пријави против него од сите страни, но залудно, па прашуваме, кој го штити Крсто?

❗️ Тинејџер од чиста мира злоставува мачка, се снима и објавува на Фејсбук. Кога во државата нема едукација на младите за животните и нивните права, кога насилството ниту се препознава како такво, превенира а уште поретко санкционира, вакви случаи стануваат правило, а не исклучок. Ј. Ѓоргиев е момче од Градско Балдовци кое од разонода се изживува врз мачка, најгрубо ја тегне додека животното се обидува да избега и потоа со сета сила ја фрла врз кров. Од чиста мира, поради забава. https://www.facebook.com/strumicadenes/videos/1459477377575884

❗️ Борби со кучиња на секој чекор, но нема кој да ги казни. До толку, што се врши договарање, закажување на борбите на Фејсбук, а институциите се толку млитави што никој не се ни плаши од објави на видеа или трофејни фотографии на кучето победник. Се толерира/ овозможува/учествува во сериозен облик на криминал, лесна заработка преку крвта на животните. Еве една цела банда кои слават што нивното куче го парчосало и убило противникот.

❗️❗️❗️ Постојат ли институции во оваа држава или е ова исто така некое ново „нормалнo“?! По кој знае кој пат се обраќаме до институциите – МВР, АХВ, општините – итно да постапат согласно надлежностите и извршат истрага, реагираат по доказите кои ги приложуваме но кои се достапни јавно и ги има буквално на секој чекор и најстрого да ги казнат сторителите на овие дела! Наместо инспектори кои на активисти им дишат во врат (бидејќи привремено згрижуваат повеќе животни), бараме итно да излезат на терен и гонат насилници и криминалци! Бараме парични казни согласно Законот за заштита и благосостојба на животните, и конечно соодветна примена на Кривичниот законик и без исклучок казна затвор за секој оној кој ќе мачи, се изживува, убива животно!